ononongan da kavavatanen no kakowapa, amiyan so manoktok so mata no kanakan a tazokok, mivahay sira do takey, no macita da o ma veyvoh a kanakan am, mangey da toktokan o mata da, ori ji da mapaloloi so kanakan do takey no rarakeh, ta ikanginanawa da sira toktokan no tazokok. amiyan so mingaran si Lovong a likey a mahakay doili, ipisa do araw am, lapwen na kangay na do takey ni ina na, maniring si Lovong am, mo ina, ma cikehza ko jimo a mangay do takey, ta mangay ko pala milingalingay do kawakayan, manireng si ina na am, yamiyan do takey so manoktok so mata no kanakan a tazokok, manginanawa ka, ori ji mo macihzai jiyaken, ikongo do jina ngapiya ni nana macihza do takey, torana lisna do teyrahem a omlavi si Lovong.

miratateng am, ikarilaw ni ina na si Lovong a tolavi am, maniring am, ji ka rana lavi, ciyaha ta macilolo ka jiyaken do takey, am no si mamizeng mo o tazokok am, ji mo ngineynarai, ta toktokan na o mata mo, moring rana si Lovong, ta katoposan na o cireng no ina na, alaken na rana si Lovong no ina na, somibo do takey.

miwalam do sarowap si Lovong am, to na mizeng o em em！tazokok, ikalak na ni Lovong, ineynaran na o tazokok, em em tazokok, to mipey pakarang o ciring na, mamizing na ninana am, mangay na nanawen o anak na, nipaka citan na rana so tazokok a mangay do anak na, mangap so kayo ivozaw na so tazokok, ka ji na nitoktokan ji Lovong, mi oli rana o tazokok do kavyawan.